Dat Land Bremen  treckt sik över mehr as 40 km an de Werser langs, mehrsens up de rechte, aver deelwies ook an de linke Siet.
Un de geografische Midde liggt in Bremen-Noord. Also door, wo wi mit Di or mit Jo mit us Tuur anfangen wüllt.

vegesack250 


In Bremen-Noord gifft dat dree so nöömt Ortsamtsbereiche: Blomendaal, Veesack, Borg-Lesen.
Hier un door treckt de sik as so’n smaal Hanndook an de Werser or an de Lesen langs, an eene Steed bloots een’n Kilometer breed. Un överall findt sik hier un door welke intressante Details.  Een groot Deel dorvun koomt ut de trüchliggen Tieden, wo veele Reeder un Kooplüüde ut Bremen just hier in Bremen-Nord  ehre Sommervillen harrt hebbt, oftins middenmang in wunnerschöne Parks, wo vundaag mehrsens  all Lüüd, de dat wüllt, spazeeren gohn köönt. Een vun düsse Rebeeten het den Namen ’Bremer Schweiz’, de grottstendeels aver in Neddersassen liggt.

torf250 




Bannig veele Saken in düsse Region sünd dat Hen- un Ankieken weert.
Een paar dorvun wüllt wi Jo hier nu vörstellen:

blomendahl250 



Dat ’Haus Blomendal’ is eegentlich een old Waterslott (in Blomendal ).
Bit to de dartige Jahren vun’t lesde Jahrhunnert weer dütt Huus de Steed, vun wo de  preußische Landraat, de för dat Landratsamt Blomendaal tostännig weer, sien Rebeet verwalten dä, ehr dat in’t Jahr 1939 een grood Deel vun den Landkreis Blumenthal to dat Land Bremen
toslaan worrn is.

bwk250 




In fröher Tieden geev dat in Blomendaal de een un anner Warft, wo holten Scheep boot worrn sünd.
Door is nix mehr vun nableven. De Industrialisierung aver hett ehre Sporen trüchlaten, to’n Bispeel de ’Bremer Wollkämmerei’. Wieterhen gifft  dat in Blomendaal aver ook so nöömt ’Naturschutzgebiete’, de ook to Radtuuren upföddern doot.

valentin250 

’N paar Kilometers dorvun af na Norden hen findt sik de ’Bunker Valentin’, de in de Jahren vun 1942 bit 1945 vun Zwangsarbeiters un KZ-Häftlinge boot worrn is. De Plaan weer, hier U-Bööt för den Krieg tosamentoboon. Veele vun de Arbeiders sünd domaals dorbi dood gohn.
De Bunker is 420 Meters lang, 100 Meters breed un 33 Meters hoog un he steiht vundaag as een greesig-düüster Mahnmaal an’t Över vun de Werser.  De Bunker un de Reste vun een Lager köönt besichtigt warrn.

oekost250 



In Schönebeck, an de Grenz to Neddersassen, liggt de so nöömt’Ökologiestation’. Fröher weer dat dat ’Hofmeierhaus’, boot 1911., dat to  een groode Villa tohören dä. Hier kann een in een Wald rumlopen, de meist so is, as de Natur ( un nich de Minsch ) em hebben will. Ook köönt de Besökers hier veele Vogels un Insekten to sehen un to hören kriegen un dorbi kunnig warrn, woans in de Natur dat en un anner ( ökologisch ) tosamenhangt.  Düsse Ökologiestation warrt vun een Vereen  organiseert, grottstendeels ehrenamtlich.

wal250 



De een Vermaak an Natur un an Geschichte hett, de kummt in Bremen-Nord seker ook noch an annere Steden up siene Kosten: Dat gifft den ’Vegesacker Stadtgarten’, de een Deel vun de so nöömt ’Maritime Meile’ is, dat gifft den recht grooten ’Knoops Park’ in Lesen und St. Magnus, den ’Friedehorst Park’, den ’Lehnhof’  un dat ’Ruschdahlmoor’.  Dorbi is to överleggen, of een dat tofoot or  mit ’n  Fahrrad beschicken will.

yacht250 



An de Steed, wo 1805 all de Veesacker Lüüd den so nöömt ’Bürgereid’ herseggen mussen, wenn se Bremers warrn wullen, wiest vundaag de ’Museumshaven’ mit siene  mehr un min olen Scheep up fröher Tieden hen. Hier hett dat mit dat Boon vun Scheep in Veesack anfungen. 
Överbleven is een Bedreev, vundaag grottstendeels up de anner Siet vun de Werser, in Lemwerder, wo ook bannig groote Luxusyachten för bannig rieke Minschen boot warrt.

haven250 




Veel över dat, wat fröher mit dat Boon vun Seil- un anner Scheep  un wat mit den Waalfang to doon harr, kann een in dat Heimaatmuseum ’Schloß Schönebeck’ un in dat Museum ’Vegesacker Geschichtenhaus’ , wat de öllste Spieker in Veesack weer, to sehen kriegen.

deutschland 



Glieks bian is dat ’Schulschiff Deutschland’ an so’n Kaje fastmaakt – 86 Meters lang, 12 Meters breed un de Masten bit to 52 Meters hoog. Dat Seilschipp is 1927 in Bremerhaven boot worrn un is dat lesde düütsche Vollschiff, dat bedüüdt, dat hett an all dree Masten Rahseils. Dat Schipp höört den ‚Deutschen Schulschiff-Verein’ to. Fröher sünd de jungen Seelüüd för de Handelsmarine ook up dütt Schipp utbildt worrn. In de lesden twintig Jahren hett dat Schipp aver sien Verwennen as Touristenattraktion.  Aver dat Schipp is vundaags ook een Oort, wo sik Lüüd trooen laten köönt, wo Kinner döfft warrn köönt, wo een Partys fiern kann or wo Touristen, ton Bispeel Radfohrers, Nachtquarteer nehmen köönt, in so’n Kamer mit twee Betten övereenanner.

raps250 




Een besunnere Fahrt,  –  ook jümmers noch för de Nordbremer –  is een Radtuur to de  ’Moorlose Kirche’ in Nedderbüren,  een Kark ut Backsteenen ut dat 13. Jahrhunnert. De Fahrt geiht jümmers uppen  or an’n Diek langs, toeersd langs de Lesen un denn langs de Werser, vörbi an groote Rebeeten, de unner Naturschutz stoht.